Ospakizuna eta aldarrikapena
Joan den ostegunean ospakizun eta aldarrikapen giroan egin zen Altzako Historia Mintegiaren ohiko Batzar Nagusia. 2025ean zehar burututako jardueraren errepasoak eta gaur egun esku artean ditugunek, zergatik ez esan, pozez betetzen gaituzte. Berrogei urte lanean, AHM-k 186 bazkideen babesa du, isilik proiektuak gauzatzen laguntzen duen kolaboratzaile sare bat, eta ilusioz eta konpromisoz beteriko talde bat.
2026an zehar AHM-k martxan dauden proiektuekin jarraituko du: Tokiko Bilduma, webgunea eta sare sozialetan presentzia mantendu, Barrutian parte hartu eta gainerako elkarteekin lankidetzan aritu, txangoak antolatu, eta abar. Baina gure berrogeigarren urteurrenagatik aurtengoa berezia denez, jarduera bereziekin ospatuko dugu: urtea amaitzean liburu dibulgatibo bat argitaratuko dugu Altzaren Historiari buruz, azken lau hamarkadetan argitaratutako lanen oinarrian egina. Liburuarekin batera, 1990ean argitaratutakoaren lekukoa hartuko duen Altzako Mapa berria argitaratzeko prestaketak ere egiten ari gara. Bestelako kontu bat ere badugu aurten: heroina-kontsumoak eta hiesaren estigmak markatutako urte tragiko haien memoria historikoa berreskuratzeko lanari ekin diogu.
Baina aurtengo Batzarrak aldarrikapen kutsua ere izan du. Urtez urte ezintasunez ikusi dugu nola suntsitu, desagertu eta abandonatzen den altzatarren ondare historikoa, askotan Donostiako Udalaren eskutik bertatik, hain justu ondare hori babestearen ardura nagusia duena; hala ere, kontrakoan jarduten du. AHM-ren berrogeigarren urteurrena ospatzeko Batzarra Altzako udaletxe zaharrean egin da, bere zoriari utzitako eraikin batean, etorkizunerako proiekturik gabe, garbitze eta mantentzerako aurrekonturik ere ez duena. Batzarrak bere egin du joan den urteko maiatzaren 26an egindako Barrutiko Batzarrean onartutako ebazpena, zeinean udal gobernuari eskatzen zitzaion gaiari buruz erantzutea (ikusi hemen onartutako testua), eta aldarrikapen berean tematzearen alde egin du, zuzenean alkate berriari helarazita.
