Kultura Altzan: Argi gorria piztu da
Iñigo Landa
Prentsaren bitartez ezagutu ahal izan dugu 2001. urterako Donostiako udalak prestatu duen aurrekontu proiektua. Kulturari dagokionez eta beste auzoetan ez bezala, Altzan ez da inbertsiorik aurreikusten. Beharrik ez dagoelako ote? Behin eta berriro entzuna dugu Altzako kiroldegian, liburutegian, zein ikastaroetan ematen direla erabiltzaileen kopururik baxuenak. Eta lotsarik gabe aurpegiratzen ohi digute administrazioaren arduradun politikoei zein teknikariei arlo honetan ahalegin handiagoa erreklamatzen diegunean. Altzatarren kultur eskaera urria edo udalaren axolagabekeria aurrez aurre, edo batera. Hau da koska. Estatistikak egiten dituztenean aprobetxatzen dute gogorazteko gurean daudela maila ekonomiko apalena eta ikasketa maila baxuena. Baina aurrekontuen garaian ahaztu egiten zaie eta, inaugurazioen efektua pasa ondoren, instalazioak bezala egitasmoak ere zarpailtzen uzten dituzte. Azken urtebetean seinale berriak ikusi ditugu jarrera penagarri hori areagotu egin dela adierazten diguna. Eta argi gorria piztu da.
