«aiuntados en el campo
de Estibaus segun que lo havemos de uso de costumbre de nos juntar...» (Altza, 1390)

Amaia Agirregabiria

Hilabete honek ere urtero bezala ezagutu berri du euskaldunon ohitura bihurtzen ari den “Durangorako Peregrinaje Kulturala” delakoa. Ez gara honakoan ohitura horrekiko sortu diren alde eta kontrako argudioak aztertzen hasiko, Azoka berak sarean duen isladaz baizik.

Egia esanda, eta urtez urte Azokak komunikabideetan hartu duen indarra ikusirik, deigarria bihurtu da sarean duen erreflexu eskasa. Urte batetik betera edukiez soilik aldatu den webgunea, www.durangokoazoka.com, aurtengo ediziorako atal berria sortu du, www.durangokoazoka.com/azoka02/index_e.htm helbidean hain zuzen ere. Gaur egun sareak eskaintzen dituen baliabide teknologikoak kontuan hartuz, harrigarria sorta dakiguke webgune honen egoera, batez ere Azokara modu fisiko batean bertaratzerik izan ez dugunontzat. Beharbada, liburuak online saltzeko aukera eskaintzeak bertaratzeko ohiturarekin amai dezakela jakin badakigu, baina badira hainbat bide bertan gertatzen ari dena Euskal Herriko mugetatik at zabaltzeko, eta kanpoan dabiltzal hainbat euskaldun gertakari kultural honetara gerturatzeko.