«aiuntados en el campo
de Estibaus segun que lo havemos de uso de costumbre de nos juntar...» (Altza, 1390)

Hilabete asko igaro ondoren, uda honetan Altzanet webgunea berriro martxan jartzea lortu dugu.

Ez da prozesu erraza izan, baina aldaketa batzuk egiteko aprobetxatu dugu. Hona hemen esanguratsuenak:

• Domeinu-aldaketa egin dugu, euskal kultur komunitateko kide izatea azpimarratzeko, baina altzatar nortasun-ezaugarriak mantenduz. Web orriaren helbide berria www.altzanet.eus da, baina, aldi batez, aurreko helbidetik web orrian sartu ahal izango da.
• Diseinua ere aldatu egin dugu, baina ahal den neurrian aurreko gunearen antzeko edukien egitura mantentzen saiatu gara.
• Era berean, sare sozialei bultzada handiagoa eman nahi izan diegu.

Azken puntu honi dagokionez, aipatzekoa da uda honetan Altzako emakume-elkarteen (Elkartea Berri, Ostadar eta Uztai Belar) jardueren 17 ordu baino gehiago digitalizatu ditugula, argitaratu ondoren Altzako Tokiko Bilduman katalogatu ditugunak eta Altzanet youtube kanalean ikus daitezkeenak. Elkarte horiek 90eko hamarkadan egindako jardueren 32 bideo daude.

Une honetan, web gunea martxan jarri ondoren, lanean ari gara eduki berriak eskaintzeko eta lehendik daudenak osatzeko.

Youtubera igo dugu joan den irailaren 15ean ospatutako “Intxaurrondo txuri beltzean” liburuaren aurkezpenaren bideoa. Denera 30 bat minutuko iraupenekoa da. Lehen zatian, Kultur Etxeko, IZBEko eta AHMko ordezkariek liburu berriari buruzko azalpenak ematen dituzte, eta, 18. minututik aurrera gutxi gorabehera, argazki aukeraketa batekin egindako muntaketa ikus daiteke. Bideoa “Intxaurrondo tiene cosas” auzoko himnoarekin amaituko da, bertaratutako guztiek abestuta.

“Orain dela…” izenburupean Altzako Tokiko Bilduman jasota dauden ikus-entzunezko dokumentu sorta bat eskainiko dugu. Dokumentu hauek Youtubeko Altzakanala kanalean ere ikus daitezke.

Gaur eskaini dugun bideoan Altzakoak Kirol Elkarteak antolatutako Altzako Udaberriko I. Krosaren haur-lasterketaren irudiak ikus daitezke. Grabazioa Luis Ezkerrak egin zuen VHS lehen bideokameretako bat erabiliz.

Lasterketa horretan mutilen kategorian lehenengo hiru sailkatuak hauek izan ziren: Javier Pérez, Carlos Rodríguez eta Juan Antonio Hidalgo. Nesken kategorian, bestetik, lehenengo hiruak hauek izan ziren: Nuria Cantera, Gemma Pastoriza eta Noelia Quintas. Lasterketa bukatu zuten 84 neska-mutilen denbora eta postua ikusteko klik egin hemen.

Herrerako Aterpean egin genuen Altza, Hautsa Kenduz liburuaren aurkezpenean “Txuri-Urdin bolatokia 1975-2007” bideoa proiektatu genuen. Darieta baserriaren inguruan eraikitako bolatokiaren irudiak ikusteaz gain, bideoan zehar Pedro Lazkano eta Antonio Goenaga bolariek bolatokia egiteko asmoa nola sortu zen, nolako giroa bizitzen zuten eta bola jokoaren zaletasuna azken hamarkadetan nola aldatzen joan den gure artean kontatzen dute. Bideoa Youtuben jarri dugu, Altzakanalan. Youtuben gaudela bidenabar Antonio Goenagaren kanala bisita dezakegu, jakina, bola jokoari eskainia.

Honez gero, Pako Laskonateguyren omenez ekainean ospatu zen kontzertuaren piezak igo ditugu Youtubera. Igotako hauekin Youtubeko AltzaKanala kanalean hogeita hemeretzi bideo daude ikusgarri.

Irudiaren gainean klik eginez, kontzertu hartan Aita Sierra abesbatzak eta Donostiako Udaleko Txistularien Bandak interpretatutako “Donostiako irrati iragarkiak” ikusi eta entzun dezakezue, “Churrería Celigüeta, El Búfalo eta Amuebladora Comercial Hispania” denden iragarkiak, Jagoba Astiazaranek egokituta.

Iñigo

Moebius joan da, Arzak geratu da. Arzak zelataria jaio zenean Arzak sukaldariak bere lehen Michelin izarra eskuratu zuen. Arzak, Arzach, Harzak, Harzack edo Harzach, izen aldakorra izan du Moebiusen pertsonaiak, haren ametsetatik sortua, fikzioaren munduan hegalari. Elkarrizketa batean zioenez, “Arte aplikatuetan”,- “les Arsap“-, inspiratu zen izena jartzeko orduan. Gero, halabeharrez etorri dira kointzidentziak.