Herrera eta Bidebieta 1840. urteko grabatu batean
Iñigo Landa
Aspaldiko irudien bila, merezi du orrialde hau bisitatzea Interneten: www.albumsiglo19mendea.net. Web interesgarri horretan Gipuzkoako Foru Aldundia kultur zentro desberdinetan gordeak dituen Euskal Herriari buruzko 4.000 inguru irudi bildu eta erakusten ditu.
Bilduma horretatik Donostiako Untzi Museoan gordeta dagoen grabatu eder hau aukeratu dugu. Irudia 1840. urtekoa da eta G. Carpenter-ek egin du. Ezkerraldean Bidebietako inguruak ikus daitezke, Moneda, Guardaplata, Santa Barbara eta Gomistegi baserriak. Eskuinaldean Herrerako etxeak, Bentagoia eta Peruene izan daitezke, eta badiaren adarra. Garai hartan errepide nagusia egin gabe zegoen eta Herrerako plaza dagoen eremua itsasgorarekin ur azpian geratzen zen. Goialdean, txiki baina nabarmen, Arriaga eta Casares oinetxeak ikusten dira.
