Altza 2025 egutegiaren eta altza.info webgune berrituaren aurkezpena

2024, Abenduak 6

gonbidapena2025

Atsegin handiz gonbidatzen zaituztegu datorren abenduaren 20an, ostirala, 19: 00etan, Tomasenen, Altza 2025 egutegiaren eta Altzako Tokiko Bildumaren web orri berrituaren (www.altza.info) aurkezpenera parte hartzera. Horrekin batera, arratsaldean zehar, 6etatik 8etara, Bilduman berriki sartutako dokumentuekin prestatu dugun erakusketa txiki bat ikusi ahal izango duzue, “Aldaketen garaiak (70eko eta 80ko hamarkadak)” izenburupean.

Egutegi berriko irudiak San Telmo Museoko Galarza argazki funtsetik hartu ditugu. Funtsa hori Gregorio González Galarza eta bere seme Carmeloren lanekin osatuta dago. XX. mendearen lehen erdiko argazki multzo garrantzitsu bat da eta argazkiak batez ere postal gisa erreproduzitzeko eginak dira. Egun hauetan San Telmon “Donostiaren oroigarri” erakusketa bisitatu daiteke, funtsak dituen 3.000 argazkien artean egindako aukerarekin. Argazki multzo osoan Altzako hainbat txoko jasotzen dituzten hogeita hamar bat daude (ikus Estibausen “Oleta eta Buenavistaren antzinako hiru argazki“). Horietako bi egutegi handirako eta txikirako aukeratu ditugu, eta katalogatuta dauden gainerakoak Altzako Tokiko Bilduman ikus daitezke.

Egutegiarekin batera, aipatutako Altzako Tokiko Bilduma bera izango da arratsaldeko protagonista nagusia. Bildumaren webguneak, www.altza.info, 16 urte bete ditu unean-unean bere zerbitzua eskaintzen, eta aurten eraberritzeko aukera izan dugu, forman eta funtsean, Ekialdeko Barrutiaren laguntza ekonomikoari eta borondatezko lan profesional garrantzitsu bati esker.

Altzako Tokiko Bilduma Donostia Kulturak eta Altzako Historia Mintegiak Altzako ondare dokumentala bildu, zaindu eta ezagutarazteko sortutako dokumentazio zerbitzua da. Bildumak 1986. urtean lehen urratsak eman zituen eta geroztik izaera eta eduki desberdineko dokumentuak bildu ditu (artxiboko dokumentuak, argazkiak, prentsa-kronikak, mapak, ikus-entzunezkoak…). Hasieratik Casares kultur etxean izan du egoitza eta bertan kontsulta zerbitzua eskaintzen da, eta baita Interneten ere, eraberritu berri dugun webgunearen bidez. Gaur egun, Bildumak 23.000 dokumentu inguru biltzen ditu, eta horietatik 19.600 baino gehiago eskuragarri daude webgunean. Azken hamabi hilabeteetan 92.289 bisita izan ditu, eta horrek erakusten du nolako zabalkunde garrantzitsua lortu duen.

Espero dugu webgunearen itxuran eta nabigazioan egindako aldaketak eta, aldi berean, bilaketak egiteko tresnetan egindako berrikuntzak lagungarriak izango direla Bildumako edukiak jende gehiagorengana iristeko eta bilaketetan ahalik eta emaitzarik onenak lortzeko.

Hasieran esan dugun bezala, aurkezpenaren aurretik eta ondoren Bilduman katolagatutako aldizkari, egutegi, eranskailu eta argazkiekin erakusketa txiki bat ikusteko aukera izango dugu, gehien bat aurten katalogatuak eta 70eko eta 80ko hamarkadetan izandako aldaketen berri ematen digutenak. Erakusketa ostiral arratsaldean bakarrik ikusi ahal izango da, baina aurrerago jartzeko aukera izatea espero dugu.

Iruzkina idatzi

Estibaus

Atalak

Abuztua 2025
A A A O O L I
« uzt    
 123
45678910
11121314151617
18192021222324
25262728293031

RSS

Azken iruzkinak

  • Ion Urrestarazu
    (2025, Abuztuak 12)
    «A mi siempre me llamó la atención, pues no parece muy heráldico, y viendo la complejidad de las piezas exhibidas ...»
  • Estibaus
    (2025, Abuztuak 11)
    «"Baserria" erakusketarekin batera, irailaren 10ean , Gipuzkoako Foru Ondare Historiko-Artistiko Saileko Ainara Iroz Zalba eta Josu Maroto Peñagarikanoren eskutik ...»
  • Zigor Etxeburua
    (2025, Uztailak 23)
    «Zorionak egindako lanarengatik. Datuz ederki hornitu duzue, eta Altzako garapen ekonomiko sozialaren alderdi ezezagun hau argitara eman duzue. Interesgarria litzateke ...»
  • Joseba M. Peña
    (2025, Uztailak 22)
    «Eskerrik asko hitzak hauengatik. Besarkadak »
  • Luma
    (2025, Uztailak 4)
    «Oso oso interesgarria. Mila esker. »

etiketak


Sarean