«aiuntados en el campo
de Estibaus segun que lo havemos de uso de costumbre de nos juntar...» (Altza, 1390)

Euria, hotza, katarroa, gripea, eta neguko gainontzeko ajeak ere ez ziren oztopo izan Tomasenen joan den ostiralean berrogei lagun biltzeko eta egutegi berria aurkeztuz, giro gozo eta eztitsu batean, 2018 urteari ongietorria emateko.

Urte berriaren egutegi handia eta txikia ilustratzeko Polentinoseko kondeak 1910 urte aldera egindako argazki estereoskopikoak hartu ditugu. Hemen Estibausen hitz egin genuen horri buruz bere garaian.

Aurkezpenean zehar argazki estereoskopikoen bitartez hiru dimentsioetako pertzepzioa nola lortzen den ulertu eta esperimentatu ahal izan genuen, eta, horrekin batera, irudietan agertzen diren eraikinak eta garai hartako beste xehetasunak hauteman ahal izan genituen. Horien artean, baserrien narriadura eta bertan bizi direnen baldintzak penagarriak nabarmentzea merezi du.

Horren adibide garbia Casares baserria da eta gertutik ezagutzeko aukera izan genuen Itziar Artola Ezeizaren lekukotasunari esker. Itziar 1936. urtean Casaresen jaio zen eta proiektatu genuen bideoren bitartez bere familiaren bizimodu gogorra kontatu zigun eta, batez ere, nola bere ama Dominika, alargundua, kemen handiz, zortzi seme-alaba estutasunen artean aurrera atera zituen. Ama Casaresen 70. hamarka amaieran auzoko eliza egiteko etxea utzi behar izan zuten arte bizi izan zen bertan. Geroago egin zuten egungo Casares kultur etxea. Bideoa hurrengo batean jarriko dugu hemen.

Egutegia nahi duenak Casaresen aurkituko du, baita egutegia argitaratzen lagundu digutenen bitartez ere: Eroski Altza eta Txukun komertzioak, Nido eta Zumardi tabernak, eta Betikoak garraioak.