Villa Lolita txakurtegia
Pasa den ekainaren 10ean 30 urte bete dira Villa Lolita eraitsi zenetik, Altzako txakurtegia bezala ezagunagoa.
1963 urtean, “Sociedad Protectora de Animales y Plantas de Gipuzkoa” elkarteak Villa Lolita erosi zien Franco anaiei aterpetxe gisa egokitzeko eta, etxe horretan etxeko animaliak, txakurrak eta katuak batez ere biltzeko. Hurrengo urtean, horrela hasi zen funtzionatzen. 1969 urtean, 126 txakur eta 30 katu bildu zituzten, Auñamendi Entziklopedian jasota dagoen arabera.
60ko eta 70eko hamarkadetan Villa Lolita inguruan hazkunde handia egon zen eta elkartearen kudeatzaileek etxea saltzeko erabakia hartu eta inguruan biztanle gutxiago zituen beste eremu bat erostea erabaki zuten.
Hala ere, animalien aterpetxerako kokapen berri bat erosteko ahaleginak ozotopo ugari aurkitu zituen bidean eta konponbidea ez da 1985. urtera arte lortuko; izan ere, Donostiko Udalak Villa Lolita erosi zuen eta diru horrekin Igara auzoan lursail bat erosiko dute. Baina zabaldutako konponbide horrek ere bide laburra izango du, erositako finkarekin mugakide diren lursail batzuen jabe baten oposizioaren ondorioz.
Bulegoetan alternatiba baten bilaketa 10 urtez baino gehiago luzatu zen bitartean, Villa Lolitaren osasungarritasun-maila, auzokideentzat nahiz animalientzat, oso kaskarra zen eta gainera, animaliek pilaketa handia pairatzen zuten.
1970eko hamarkadaren amaieratik eta 80ko hamarkada osoan, Villa Lolitatik hurbilen zeuden auzokideen eta inguruko biztanleen kexak ugariak izan ziren. Hauek ziren batez ere:
- Finkaren egoera higieniko txarrak, usain txarrak sortzen zituena, arratoiak ugaritzea …
- Eraikina eta hesia hondatuak zeuden, txakurrak finkaren kanpoaldetik eramateko aukera ematen zuena, inguruko baratzeetan kalteak eraginez.
- Jasotako zakur kopuru handiak sortzen zuen zarata, eta uneren batean 300 izatera iritsi zen.
- Animaliek berek zituzten higiene eta lur-hargune txarrak.
Egoera horren aurrean, 1989ko ekainaren 9an Donostiako Udalak erabaki zuen etxeko animalia guztiak ateratzea eta hurrengo egunean eraistea, Altzako Bildumaren bideo honetan jasotzen den momentuan.
Tamalez, Villa Lolitatik atera zituzten txakurrak, 150 inguru, hil egin behar izan zituzten egun batzuk geroago, ez baitzen lortu leku egokia aurkitzea.
Txakurtegiaren eraispenaren bideoa
Erreferentziak:
- Altzako Tokiko Bilduma: Villa Lolita
- Sociedad Protectora de Animales y Plantas elkartearen historia zehatza Auñamendi Eusko Entziklopedian, Idoia Estornés Zubizarretak idatzitako artikuluan
- Txakurtegiaren argazkiak, 1964-69 urtetakoak, Kutxatekako “Perrera de la asociación protectora de animales” sortan, Paco Marín argazkilariak eginak
