Altzako XX. Bertso Aroa
Iñaki Lertxundi Olasagasti
Ezohiko egoerak bultzatuta, aurtengo Bertso Aroa udazken betean datorkigu.
Martxoaren bueltan abiatzekoak ginen baina pandemiaren etorrerak dena hankaz gora ipini zuen eta aurre ikusita genuen egitaraua behin behinean alboratzea ekarri zuen.
Bertso Aroa denon artean aurrera ateratzeko borondate eta gogoak ahalbideratu du aurtengoari huts egin ez izana.
Bertsolaritzaren ekosistema aberatsa eta askotarikoa balioan jarri eta bide emateak gogo betetzen gaitu.
Egoera zaila honetan sortzaileei, askotariko plazak ziurtatzea aski garrantzizkoa begitatzen zaigu.
Aurtengoa, berezia dator, sasoi honetara egokitua, baina erronkari eutsi diogu eta bertsoaren oihartzunak Altzan hitzordu nahitaezkoa dauka.
Aldaketak datoz…
Urtero burutzen dugun Bertso Bazkaria ezin izango da burutu.
Arduraz jokatzea erabaki dugu eta gauzak onbidean hurrengo urtean Nerea Ibarzabal eta Julio Soto gurekin izango ditugu.
Ohiko Nido-ko saioa ere ezin izango dugu burutu eta bertan egitekoak ginen emanaldia “ERRADIKALAK GINEN” Tomaseneko aretoan burutuko dugu.
Obratzekoak diren emanaldietarako aldez aurretik gonbidapen sarrerak eskuratu behar dira eta “Gorria” emanaldirako sarrerak aurrez eskuratu beharko dira (donostiakultura.eus). Denak saltzen ez badira,egunean bertan eskuratu ahalko dira.
Gonbidapenak lortzeko bi bide ipini ditugu:
casareskulturetxea@donostia.eus
Tfnoa- 943351149
Animatu zaitezte!
