Aurtengo Batzarra eta planak
Joan den ostegunean egin genuen Tomasenen AHMren urteko Batzarra. Estibaus buletina banatu genuen (hemen deskargatu daiteke), non 2020ko jarduera paperean jasoa geratu den, eta haren bitartez urtean zehar egindako lana errepasatu genuen. Pandemiak eragindako murrizketek elkartearen jarduera baldintzatzen ari da, argi eta garbi, baina halere iazko balantze orokorra ona da; izan ere, jarduera batzuk murriztu edo eten egin ba ziren ere, beste batzuk normaltasunez egin ahal izan ziren, eta besteen kasuan, berriz, areagotu egin dira, digitalean egiten diren jardueretan bezala.
Aurtengoari begira, eremu digitalean irekita ditugun jarduerak lantzen jarraituko dugu (dokumentazioa, sare sozialak, blogak…), eta, batez ere, Altzanet web gunea, gure jarduera digital guztien aterpea dena eta aurten 25 urte beteko dituena.
Aurrez aurreko jarduerekin ere jarraituko dugu, jakina, horiei arreta berezia eskainiz. Aurtengo Altzako Naturaldia amaitu berri dugu, eta oso parte-hartze ona izan du, bai ibilaldietan, baita hitzaldietan ere. Txangoei dagokienez, Plus 55ekoak martxan daude. Orain arte bi egin dira, eta ekainean beste bi egingo ditugu. Uztailean seguruenik bosgarren bat egingo da, baina konfirmatzeke dago, eta uda ostean beste batzuekin osatuko dugu aurtengo egitaraua. Egindako jardueren argazki-erreportajeak ikus ditzakezue hemen.
Bestalde, uztailerako erakusketa berri bat prestatzen ari gara Garberan, Bidebietako argazkiekin. Auzoko bizilagunen laguntza izan dugu Tokiko Bildumaren funtsa aberasteko, eta, udazkenari begira, Bidebietaren inguruko eta auzoan bertan egin beharreko jardueren programa zabalago batean pentsatzen ari gara. Garberako erakusketekin lotuta, aurreko aste hauetan zehar, aurreko hiru edizioetan azaldutako argazkiak aldi baterako banatu eta zintzilikatu dira gure auzoetako taberna batzuen artean, eta ostalarien eta bezeroen artean oso harrera ona izan dute.
Azkenik, Errepublika eta sufragio zuzenaren bidez hautatuak izan ziren zinegotziekin osatu zen Altza Herriko udalbatza bakarra ekarri zituzten udal-hauteskundeen 90. urteurrenarekin bat etorriz, lanean ari gara Ekialdeko Barrutiko Memoria Historikoaren batzordearekin, gure historiako aldi garrantzitsu horretan korporazio hautetsiak egin zuen lanaren aitorpen instituzional eta herrikoia egiteko, aurreikuspenen arabera irailaren 11n ospatuko dena.
Jarduera horien eta urtean zehar sor daitezkeen beste batzuen berri garaiz emango dizuegu, zehaztu ahala.
