Txotx!
2004, Martxoak 1
Unai Elizasu
Doinua: “Esplikatzera noa kontuak”
Sagardotegi ta sagardoa
gure Altzakin lotzean,
garai batean kupel bi behintza
bazen etxe bakoitzean,
ta galtzearen arrazoia ere
ongi pentsatzen jartzean,
sagardotegik galdu zirela
ardo-zalek etortzean.
Sagardoaren Meka Altza zen
hala esaten da gero,
sagardotegik ugari ziren
berrogeitik gora edo,
Txirrita ere zalea genun
beti sagardotan bero
Txirrita Altzan ez zen biziko
sagardorik ez balego.
Sagardoaren gunea zen lehen
egun gunetik gain behera,
Altzara jende asko zetorren
sagardoan epelera,
sagardoaren herria ginen
egun auzo xixtrin gera,
herriatasuna galdu zen azken
kupelarekin batera.
