Bixenteri
2003, Abenduak 1
Unai Elizasu
Doinua: “Ludi bizitza abesti gozoz”
Itsasondotik gure artera
Etorri gazte xamarrik,
Bertan geratu ta bizitzeko
Ez zenun falta indarrik,
Garberan zenun zure etxea
Ez dugu ahaztu beharrik
Guretzat behintzat Garbera ez da
Denda haundi bat bakarrik.
Gure Bixente altzan barrena
Ibiliaz paseoan,
Bere makila eskuan eta
Txapela beti kolkoan,
Bizi legeak hala dio ta
Ez zaude gure ondoan,
Hala re zure bertso ta irri
Ez dira zerura joan.
Giro ederra zegon garaian
Garberara egin buelta,
Bixente hantxe bertso kantari
Txoriekin berriketa,
Joan zera baina kantuz ta bertsoz
Garbera dago beteta.
Txoriek ere zure bertsoak
Kantatzen dituzte eta.
