Altzako txokoak Galarzaren postaletan
Joan den abenduaren 16tik urtarrilaren 31 arte Altzako txokoak Galarzaren postaletan erakusketa ikusteko aukera egongo da Tomaseneko sarreran, liburutegiaren ordutegian. Erakusketa honetan ikus daitezkeen irudiak San Telmo Museoko Galarza argazki funtsetik hartuak dira. Funtsa hori Gregorio González Galarza (Zegama, 1869/Donostia, 1948) eta bere seme Carmeloren lanekin osatuta dago.
Funtsa hori XX. mendearen lehen erdiko argazki multzo garrantzitsu bat da eta argazkiak batez ere postal gisa erreproduzitzeko eginak dira. Argazki gehienak kristal gaineko gelatina teknikarekin egina dira. Galarza funtsak 3.000 bat argazki ditu. Argazki multzo osoan Altzako hainbat txoko jasotzen dituzten hogeita hamar bat daude, gehienak Pasaiako badiaren ikuspegien parte direlarik. Horietatik hamalau Altzako Tokiko Bilduman katalogatuta daude (ikus hemen) eta Tomasenen sei ikus daitezke.
