2016 urterako planak
Egutegia aurkezterakoan deialdi bat egin genuen Altzako kultur elkarteak biltzeko eta gure herrian zentratutako kultur agenda bat osatzen saiatzeko. Bilera urtarrilaren 14n izan zen eta bertan hiru elkarte eta hamar lagun bildu ginen. Garbi dago egondako erantzuna motz geratu zela egin nahi genuena aurrera eramateko, baina gutxienez bilera baliagarria izan zen elkarte bakoitzak aurten egiteko dauzkan asmoei buruz hitz egiteko eta baita iritziak elkarri adierazteko ere.
Guri dagokigunez, egiten ditugun proposamenen inguruan jendearen eta elkarteen elkarlana biltzeko ahaleginean jarraituko dugu eta horrela, 2016 urte honetarako, -AHMrentzat berezia bere hogeita hamargarrena baita-, Casares-Tomasene Kultur Etxearekin lanean jarraitzeaz gain -Tokiko Bilduma garatuz, eta “Altzatik abiatutako Bideak (Plus 55) ibilaldiak eta Natur Astea antolatuz- badauzkagu proiektu interesgarriak aurrera eramateko: Album Altzatarra berri bat argitaratu; Altzaren historia gaztetxoei hurbiltzeko komiki bat prestatu; entziklopedia proiektuari ekin altza.eus domeinuaren pean; Altzako mapa berri bat; eta ibilaldiak ere izango dira.
Arreta berezia ere eskainiko diogu elkartearen barruko jarduerei, hala nola Altzanet webaren berrikuntza, Estibaus buletinaren paperezko argitalpena, Ganbara Bildumaren katalogoaren argitalpena prestatzea, eta elkartearen artxiboaren antolaketa.
Proposamen bakoitzaren xehetasunak urtean zehar ezagutaraziko ditugu eta espero dugu, egin ditugun hogeita hamar urte horietan bezalaxe, jarduera guztiek parada eskainiko digutela elkarrekin topo egiteko eta Altzari buruz daukagun ezagutza hobetzeko.
