Txoritokietarako bidezidorra itxita
Altzatik Txoritokietara edota Perurenara joateko bidean, Bordaxar baserriaren paretik igaro ondoren betidanik ezagutu dugun bidezidorra, Berrazpingo aldapa alegia, itxi egin dute.
Negu aldean, azken aldiz zeharkatu genuenean, oteak nagusitzen ari ziren. Pasatzerik bazegoen ere, gero eta okerrago zegoela nabarmena zen.
Azkenik, norbaitek hesia jarri du. Bideak denon zerbitzura daude eta ez da bidezkoa ixtea. Are gehiago bide nagusitik auto trafikoa izugarri handitu denean eta oinezkoentzako bideak gero eta beharrezkoagoak direnean.
Nori dagokio mendi bideak zaintzea?
Bidexka arrunt polita eta atsegina zen, eta oraindik izan daiteke. Urteen poderioz, bide bera zeharkatu dugun guztiok lurrean zizelatu dugun bidea da, aldapatsua hasieran, harri sendoz osatutako labirinto baten antzekoa goialdean. Berrazpingo aldapa, agur. Gure pausoek zure zorua berriro urratzeko itxaropena ez dugu galdu.
