“Altzak soinu, Altzak doinu” Kontzertua
Altzako Historia Mintegiaren 25. urteko ibilbidea ospatzeko, datorren ostiralean, azaroak 18, San Martzial elizan, 20:30ean izango den kontzertura gonbidatu nahi zaituztegu.
Kontzertua elkarteko bazkide batzuek urteurrenaren egitarauari egindako ekarpena izan da eta isilean gogor lan egin dute antolaketan. Asmo hori pertsona askorekin partekatu dute eta guztien artean gorpuztu dute Jose Ignazio Ansorenak landutako programa. Kontzertu berezi honetan, abesbatzak, musika joleak, dantzari eta abeslari altzatarrak entzun ahal izango ditugu; Joan Mari Irigoienek jarri dio Altzak soinu, Altzak doinu leloa eta Imanol Irigoienek irudia. Elkartearen ibilbidea omentzeko tartetxo bat ere egongo da eta zuekin guztiekin partekatu eta gozatu nahi genuke.
