Etxeen eraistea Herreran Donostiako saihesbidea egiteko
Donostiako saihesbidearen irteera Herreran eraikitzeak -1972ko abuztuaren 12an inauguratu zuen Francok, Herrerako eraispenak egin ziren hilabete berean- larriki kaltetu zuen bertako auzo-bizitza eta horren ondorioak gaur egun arte jasan dituzte herreratarrek. Aurreko egunetan telefono batetik bestera ibili den bideo labur bati esker, eta orain hemen ere ikus daitekeena, Herrerako egungo historia markatu duen garai horren oroimenei irudiak jarri ahal izan dizkiogu.
Bideoaren egilea ezezaguna da eta grabaketa bi ikuspuntuetatik egina dago. Lehenengoan kamara zabalean mugitzen du Peruene baserriaren teilatua, Etxeburua etxea, Villa Concheshi eta San Luis ikastetxea eta eliza erakutsiz. Bigarren ikuspuntutik, lehenengoaren beste aldean, Peruene-Berri fatxadaren aurrean, ikuspegi zabalago bat hartzen du, elizatik Txingurri alderaino, tartean eraisten ari diren etxeen xehetasunak, Altzagaina eta Txirrita eta Larratxo pasealekuko urbanizazio lanak ikus daitezkeela.
Bideo honek balio berezi bat dauka guretzako garai garrantzitsu haiek jasotzen duten dokumentu grafiko gutxi baitaukagu.
