«aiuntados en el campo
de Estibaus segun que lo havemos de uso de costumbre de nos juntar...» (Altza, 1390)

Antxon Alfaro

1966 urtean, Altzako ekialdean biztanle-kopurua handitzen ari zenez, behin-behineko anbulatorioa ireki zen Erroteta auzoko etxabe batean.

Hasieratik lokal horrek ez zituen osasun-zentro izateko baldintza onenak betetzen. Urteak igaro ahala, hondatu egin zen. 1981ean, SIADECOk txosten bat egin zuen Donostiako Udalarentzat Altzako udal-barruti zaharraren osasun beharrei buruz, eta honako hau adierazten zuen: “el estado actual de las instalaciones es de deterioro y miseria. (… ) Tras 14 años de uso, su aspecto es lamentable y hacen dudar a cualquiera sobre sus condiciones higiénicas.” [1]

Erroteta auzoko anbulatorioko sarrera (70eko hamarkada)

Egoera horren ondorioz, 70eko hamarkadaren amaieratik, Altza, Herrera eta Larratxoko Auzo Elkarteek anbulatorio berri bat eraikitzea eskatu zuten, espezialitate berriak ere izango zituena. Auzotarren borroka luze horren prozesuak argi erakusten du azken hamarkadetan hiriaren zati honetan lortu diren hobekuntzak herritarren aktibazioaren eta mobilizazioaren ondorio izan direla beti.

Anbulatorio berria eskatzeko manifestazioa (1981)

Herritar askoren borondatezko lanak 1985ean eman zituen bere fruituak. Garai hartako prentsan jasotzen zen bezala, anbulatorio berriak urte hartako otsailaren 25ean, astelehena, ireki zituen ateak. Azken kostua 150.000.000 pezetakoa izan zen. Eraikin berriak hiru solairu zituen, eta guztira 2.030 m2-ko azalera. Kalkuluen arabera, osasun-zentro berriak 25.000 biztanletik gorako osasun-premiei erantzun beharko lieke.

Altzako auzo elkarteak, kartel baten bidez, auzoari jakinarazi zion anbulatorio berria irekiko zutela, baita INSALUDek zer profesionalekin hornitzea aurreikusi zuen ere: zortzi mediku, hiru pediatra, hamabi erizain, lau klinika-laguntzaile, zortzi zeladore eta bi administrazio-laguntzaile. Epe laburrera, kirurgiako, hematologiako, obstetriziako, psikiatriako, odontologiako, otorrinolaringologiako, oftalmologiako, erradiologiako, errehabilitazioko, analisi klinikoetako eta larrialdietako kontsultak martxan jartzeko asmoa zuten, eta, jakina, aurreikuspenetan geratu ziren.

Anbulatorio berria eraiki zen Granja Sarasolaren lurrak (1980)

Alza-Rotetako Azpieskualdeko Osasun Zentroa izenarekin, ofizialki inauguratu gabe, jarri zen martxan. Auzoan esaten zen garai hartan Osasun ministro zen Ernest Lluch etorriko zela inauguratzera, baina hori ez zen gertatu, eta ez zen ekitaldi ofizialik izan.

Hala ere, Altza eta Larratxoko Auzo Elkarteek inaugurazio herrikoi bat antolatu zuten eraikin berriaren sarreran, otsailaren 22an, irekiera egunaren aurreko ostiralean, auzokideen lorpen handia ospatzeko helburuarekin. Auzo elkartetako kideak mozorrotuta joan ziren inaugurazio ekitaldira “ofizialtasuna” ematera. Herrerako Kilikariak Fanfarea ere bertan izan zen, eta lunch batekin amaitu zen ekitaldia. Anbulatorioan sartzeko errepidea bete egin zen, auzokide asko bertaratu baitziren. Batzuek Ernest Lluch eta PSOEko beste ordezkari politiko batzuk ikustea espero zuten, baina ez ziren agertu.

Erreferentzia:

[1] Siadeco: “Necesidad de un ambulatorio en el barrio de Alza“. Donostia, 1981, 58 or.