Ganbararen erakusketa Larratxon
Altzako Historia Mintegiko eta Casares Kultur Etxearen 25.urteurrena ospatzeko prestaturiko ekintza berri batera gonbidatu nahi zaituztegu, irailaren 19tik 23ra Larratxo Kultur Etxean antolatu dugun erakusketara.
AHMko Ganbara taldeak 14 urtetan bildutako 200 etxe-tresna inguru jarriko ditu ikusgai. Aspaldi edozein etxetan aurki zitezkeen tresnak dira, industria jatorria dutenak eta eguneroko bizitza erosoagoa egiteko sortuak.
Erakusketa honen bitartez berrikuntza industrialaren ondorioz XX. mendean zehar etxeko tresnen diseinua nola aldatu zen antzemateko aukera izango dugu. Ikusgai jarriko diren sukaldeko tresnak, ikus-entzunezko ekipoak, ikasteko metodoak, lanerako bitartekoak, jostailuak eta abar luze bat, bere ekoizpen eta erabilerari buruzko azalpenez lagunduta egongo dira.
Ganbara bilduma batez ere, jendeak dohaintzan emaniko objektuez osaturik dago eta, horregatik, gogorazi nahi dizuegu baten batek objekturen bat Ganbara taldearen eskutan jarri nahi badu erakusketan emango zaiola behar dituen argibideak.
Altzako Historia Mintegiko webgunean eskura daiteke Ganbara ekimenaren berri.
- Larratxo Kultur Etxea
- Irailak 19-20-21-22 eta 23
- Ordutegia: 16:00-19:30
