“Altza guztion artean” prozesua
Altza XXI Herri Ekimenetik, Gipuzkoako Foru Aldundiaren eta Donostiako udalaren laguntzaz, bultzatzen ari garen “Altza guztion artean” prozesuan parte hartzera gonbidatu nahi zaitugu.
Prozesu honetan altzatarrok Altzako etorkizuna nolakoa izan behar duen aztertu, hausnartu eta lantzeko helburua dugu.
Honetarako 2013an hasi ginen lanean, lehenik gaur egungo Altza nola garatu den ulertzen ibili gara, eta honetarako Altzako institutuko ikasleak, Herri Ametsa ikastolako ikasleak eta Eraikuntza institutuko ikasleekin ibili gara lanean.
Gazte hauekin Altzako inguruaren bilakaera historikoa landu dugu eta beraiekin momentuz lau maketa egiten ari gara. Maketa hauetan Altzako lurraldea nolakoa izan den azaltzen da: 1950. urtean, 1970. urtean, 1990. urtean eta 2010. urtean.
Maketa hauek orain Altzako herritar guztiei erakutsi nahi dizkiegu, denok hobeto uler dezagun Altza; eta uda arte Altzako komertzio eta toki ezberdinetan ikusgai jarri nahi ditugu ahalik eta jende gehienak ikus ditzan.
Baina lehenik Altzako elkarte eta talde guztiei erakutsi nahi dizkizuegu aurkezpen publiko batean, prozesu honi segida ematen.
Honetarako, datorren ekainaren 25ean burutuko dugun aurkezpenera etortzeko animatzen zaitugu. Zatoz eta ikusi zein nolako lana egin duten gure gazteek.
Asko hitz egin dugu Altzak dituen beharraz, onuraz eta gabeziaz. Baina orain denok elkarrekin Altzaren etorkizuna marraztu nahi dugu eta bide horretan lankide izan nahi zaitugu.
Bitartean jaso gure agurrik beroena.
