Kirola Album Altzatarra berriaren protagonista
Azken bolada honetan Album Altzatarra berri baten prestaketan ari gara lanean, oraingo honetan kirolari eskainia. Kirola gure garaiaren adierazpen nabarmenetakoa da, baita Altzan ere. Joan den mendean zehar Altzan, beste lekuetan bezala, kirol jarduera oso bizia izan da, eta horregatik merezi du monografikoki gure atentzioa eskaintzea.
Pilota dugu kirolik herrikoiena eta futbola nonahi aurkituko dugu, baina badira beste hamaika kirol neurri batean edo bestean gure artean egin eta egiten direnak, eta horiei ere gure arreta eskainiko diegu: atletismoa, txirrindularitza, xakea… Zerrenda luze bat atera zaigu, bakoitza bere eszenatoki, klub, figura… eta zaleekin. Aurreko albumen antzeko formatuan, ehun bat argazkiekin XX. mendean zehar Altzako auzoetan praktikatu diren kirolen erretratu bat egiten ahaleginduko gara. Liburua atontzeko, Altzako Tokiko Bildumaren funtsa daukagu eskueran, baita hilabete hauetan bildu ditugun beste hainbat argazki ere bai. Lana ez dago amaitua eta etxean argazkiak baldin badituzue, honen bitartez gonbidatzen zaituztegu gurekin harremanetan jartzera zuen ekarpenak egiteko. Horrela, denok irabaziko dugu.
2015, Abuztuak 21
[...] iragarri genizuen bezala, aurten kirolari eskainitako album altzatarra bat prestatzen ari gara argitara emateko. [...]