Uliako haztegiak eta ur-deposituak ezagutu
Uliako Auzo Elkarteak jardunaldi paregabea antolatu du datorren iganderako, hilak 15, udal haztegiak izan zirenak eta ur-deposituak ezagutzeko. Ulia mendirako errepidea hasten den lekuan kokatuak daude, ezkerraldean, eremu itxi batean. Bertan egon ziren Donostiako udal haztegiak 2007. urtera arte, handik Lau Haizetako Audariz baserriaren orubera eraman baitzituzten. Leku berean aurkituko ditugu XIX. mendeko ur-biltegiak, Soroborda eta Buskandoko ur-biltegiak, Mendiolako iturrietatik Donostiara ura eramateko azpiegituren lur azpiko zati ikusgarri bezain ezkutuak.
Horrez gain, leku honetan bertan dagoen Donostia eta Altzaren arteko 22. mugarria ikusi ahal izango du bisitariak, etxe nagusiko paretaren ondoan. Horrela agertzen da mugarri hau deskribatuta 1939. urteko mugarritze-agirian: “Hito de hormigón. Situación: en el paraje denominado “Viveros Municipales”, en la esquina NE. de la casa de Depósito de Aguas de Buscando y en terreno del jardín de los Viveros Municipales del Ayuntamiento de San Sebastián. Observación: al S. los caseríos de Lizardi y Zarategui. Línea de término: AR.”
Deialdian azaltzen dutenez, bisitarekin batera “Uliako Lore-Baratzak” proiektua aurkeztuko dute, gune hori parke bizi bat bilakatzeko asmoz.
Ur-biltegiak bisitatzeko 15 pertsonako 4 talde antolatuko dituzte ─9:30, 10:30, 11: 30 eta 12:30ean─ eta joan aurretik izena eman behar da formulario hau betez.
Uliako Auzo Elkarteari esker, igandekoa aukera aparta izango da Uliako bazter berezi honetara hurbiltzeko, hain gertu eta hain ezagungabe aldi berean.
