“Album altzatarra 1953-1978″ liburuaren aurkezpena
Album altzatarra 1953-1978 argazki-liburua aurkeztuko du Altzako Historia Mintegiak, ekainaren 30ean, osteguna, 7:30ean Euskal Giroa elkartean (Herrera).
AHMren 25.urteurrena ospatzeko asmoz argitaraturiko albuma, hainbat pertsonen eta elkarteen ekarpenen bidez hornitzen ari garen Altzako Tokiko Bildumako 99 argazkiez osaturik dago. 1953-1978 urte bitarteko irudi hauek, Altzaren hazkundearen eta eraldaketa fisiko zein sozialen oroimena dira, estiloen, erritmoen eta ohituren aldaketena. Argazkien bitartez, garai zail hartako komunitate altzatarra islatu nahi izan da, pertsonen eta elkarrekin bizitutakoen lekukotasuna nabarmenduz.
Albuma zerbait bizia dela kontsideratzen dugu eta argitara eman ondoren, bertan azaltzen diren argazkien gaineko informazioa; agertzen diren pertsona, leku edota urteei buruzkoa, handitu eta osatzen jarraitu nahi genuke jendeak eskainitako datuen bidez. Halaber, Altzako Tokiko Bildumaren webgunean, www.altza.info, plazaratuko dira edonor eskuratu ahal izateko.
Datorren ekainaren 30ean, osteguna, 7:30ean, Euskal Giroa elkartean liburua banatu eta aurkezteaz gainera, solasaldirako tartea izateko luntxa eskainiko da. Honen bitartez, parte hartzera gonbidatzen zaituztegu.
Argazki-liburua aurkezpen egunetik aurrera Casares Kultur Etxean salgai jarriko da 10 euroko salneurrian.
