Lekukoak: Centauro eta Gazte-Leku
Centauro errugbi taldearen jokalariak (1968)
Antxon Alfaro
“Lekukoak” proiektuaren helburuetako bat joan den XX. mendean zehar altzatarren komunitatean gertatu ziren prozesu sozialak berreskuratzea, gordetzea eta zabaltzea da. 2021 urtean, Los Boscos auzunearen jatorrian, sorreran, eraikuntzan eta garapenean jarri genuen arreta. Pasa den 2022an, 60 eta 70eko hamarkadetako gazte mugimenduaren historia landu dugu, Santa Barbara eta Roteta auzoen inguruan.
Gazte-Leku elkarteko txangoa (1970)
Prozesu hura bizi izan zutenei egindako 40 elkarrizketa baino gehiagoren bidez landu da historia txiki hau. Santa Barbarako jesuiten etxebizitzan (gaur egun La Palmera taberna) izandako lehen topaketetatik hasita, Erroteta auzoan Centauro klubarekin jarraituz, Santa Barbarako Gazte-Leku elkartearekin amaitzeko. Era berean, urte horietan garatu zituzten jarduera ugariak (eskubaloia, mendizaletasuna, euskal dantzak, atletismoa, futbola, errugbia,…) dokumentatu dira. Lan horren emaitza 2023an zehar argitaratuko da Estibaus aldizkari digitalean.
Gazte-Leku euskal dantza taldea (1972)
Aipatutako jarduerekin lotutako hainbat argazki eta dokumentu bildu dira, baita auzo horietan urte haietan izandako bizimoduarekin lotutakoak ere. Argazki multzoaren zati handi bat Felix Iranzok eta Roberto Mendigurenek egindakoa da. Azken hau, garai hartan Arriberriko San Pablo parrokiako apaiza zen. Material hori guztia digitalizatuta eta katalogatuta dago, eta Altzako Tokiko Bilduman kontsulta daiteke.
Gazte-Leku emakumezkoen eskubaloi taldea (1975)
Bestalde, ahal izan dugun neurrian, bideo-grabazioekin jarraitu dugu. Joan den udan, Santiago Leoz 96 urteko altzatarra elkarrizketatu genuen. Urtean zehar, Tina Ariasi eta Santiago Leozi egindako elkarrizketak editatu eta kodetu ditugu, ondoren web orrian jarriz.[/lang_eu
